Notas e interacción co blog

Ola nenos, nenas e familias:

Esperamos que tanto vós como as vosas familias esteades ben de saúde. Iso é máis importante nestes momentos.

Seguramente escoitaredes nos medios de comunicación noticias relacionadas co desenvolvemento anómalo deste curso. A estas alturas creo que ninguén se atreve a dicir cando poderemos volver ás aulas; esperamos que sexa axiña.

Nestes momentos, a instrución que temos o profesorado é que poñamos as notas correspondentes á segunda avaliación, tendo en conta o traballo realizado ata o día en que se suspenderon as clases. Polo tanto, como xa comentaramos anteriormente, o traballo que se vos propuxo para estes días non é avaliable. As familias van poder ver as notas a finais da semana na aplicación Abalar, que poden descargar nos teléfonos móbiles.

Ao profesorado gustaríanos saber quen está accedendo ao blog e de que maneira o facedes (ordenador, tablet, móbil...). Isto resultarianos útil para intentar facerlle chegar as actividades propostas por outros medios ao alumnado que non accede a Internet. Por esta razón, pedímosvos que vos fixedes na parte inferior desta entrada do blog. Aí aparece un apartado que pon "Ningún comentario" ou "Comentarios". Simplemente, pedímosvos que pinchedes aí e escribades algo así como: "Son Xoán, de 4º A, conéctome ao blog coa tablet (ou como sexa)". Por suposto, da mesma maneira podedes comentar dúbidas sobre as actividades ou se vos gustaría que vos propuxésemos algún tipo de actividade concreta.

Moito ánimo e unha aperta.